中国国家队喺亚洲盃首场分组赛只能0比0赛和塔吉克，第2场对黎巴嫩，万一不幸输波就大件事，亚洲足协公布中国对黎巴嫩执法球证，系来自南韩嘅高亨进，资料显示，由佢执法嘅3场重要赛事，国足全部落败，今次国足能否喺呢位「克星」手上避过一劫？

亚洲足协公布，中国对黎巴嫩主球证系南韩嘅高亨进，VAR球证系金钟赫，其中一名旁证系女球证金垧玟。原来呢位高亨进曾多次到中超执鸡，包括2020年嘅中超决赛次回合。

高亨进过去8次执法中国队赛事，国足成绩系4胜1和3负，数据似乎偏向国足，但细查之下原来系相反，事关国足喺佢手上嘅3场败仗，全部系重要赛事，包括上届世盃外对澳洲输0比3、对阿曼输0比2，同埋前届世盃外对卡塔尔输0比1。今次国足对黎巴嫩，似乎好牙烟喎。