热刺周一(15日)凌晨作客2比2逼和曼联，德国前锋迪姆华拿重返英超即刻担正，以左翼亮相嘅佢表现活跃，而且仲有1次助攻，不过射术就继续吓亲人，全场5次埋门冇脚中龙，其中1球更挞Q抽到上9楼高。迪姆华拿赛後指自己加盟第1场就喺奥脱福比赛，因太紧张影响表现，保证之後会愈踢愈好。

南韩前锋孙兴民离队踢亚洲盃，由RB莱比锡借用嘅迪姆华拿无缝接轨，今场正选上阵，不过之前效力车路士嗰阵饱受批评嘅射术，似乎仍然冇改变，今仗2次左路扣入中间起脚都射到离晒谱，完半场前一次突击黄金机会，佢单挑达洛治後左脚施射又斜出，全场5次射门0中龙。

迪姆华拿赛後表示：「首先我好开心重返英超，喺呢度踢波充满乐趣，今场睇到英超真系最佳联赛。第1次上阵就喺奥脱福对曼联，难免会比较紧张，我尝试去享受比赛，未来几日我会有更多训练，相信表现会更加好。」迪姆华拿今场助攻宾坦古亚追平，佢就话：「作为前锋当然希望入波，但助攻一样好重要。」