曼联今季防守差劲，阿根廷中坚利辛度马天尼斯长期受伤系重大原因，呢位外号「屠夫」嘅世盃冠军球员，周一(15日)凌晨对热刺相隔105日後复出，後备上阵不改「凶狠」作风，其中一次「松肘」将李察利臣撞走嘅「暗黑防守」艺术，就令曼联迷睇到拍烂手掌。

利辛度马天尼斯自上年9月底开始一直养伤，曼联防线缺少佢嘅硬净同组织，明显错漏百出，今仗佢复出喺63分钟後备上阵，即刻展现佢嘅「暗黑防守」。喺曼联一次角球攻势，李察利臣想追出禁区阻挡阿历真度加拿祖射门，利辛度马天尼斯睇准佢跑到身边，即「要人唔要波」将对方撞到碌地。

见到「屠夫」强势回归勇猛如昔，曼联球迷纷纷留言庆祝：「利辛度马天尼斯系再世坚尼」、「佢系曼联唯一识用脑同热血嘅球员」、「希望马天尼斯可以带起曼联，我哋太挂住佢」、「屠夫返嚟啦」！