王者曼城近年横扫英超，球队亦积极为未来铺路，日前正式由洛杉矶银河签入18岁中场艾卡拉。呢位墨西哥新星身形矮小，但拥有上乘脚法同视野，被北美传媒称为「墨西哥美斯」，佢加盟曼城後会先喺青年军效力。

据《曼彻斯特晚报》报道，曼城喺2020年已经睇中艾卡拉，并倾好等佢18岁生日後正式签佢。艾卡拉周三(17日)喺社交网宣布同曼城签约5年：「冇言语可以表达我依家嘅兴奋，我梦想咗呢一刻好耐，依家只系开始，我希望可以继续令大家以我为傲。」

艾卡拉签约曼城前，曾经去过巴塞隆拿、帕丘卡等球会试脚，但仍未为洛杉矶银河一队上过阵。消息指艾卡拉下半季会留喺曼城，主力为青年军比赛，来季可能会被外借去其他球会。