巴塞隆拿持续受到财政问题困扰，唔少老将面临被清洗，季尾约满嘅沙治罗拔图盛传会被放弃，不过教练沙维近日公开要求巴塞隆拿同佢续约，确保呢位队长下季继续留队。

31岁嘅沙治罗拔图今季沦为後备，不过近期伤兵满营下，做「替工」有唔错表现，沙维日前表示：「我会建议球会同沙治罗拔图续约，佢对球队好重要，可以踢多个位置，我唔需要同佢解释太多战术，佢已经好熟悉巴塞隆拿。沙治罗拔图系个自我要求好高嘅人，永远付出100%，我好满意佢嘅表现。」

巴塞青训出身嘅沙治罗拔图，之前为同球会共度时艰，依家年薪500万欧元已经系队中低薪一族，但消息指巴塞隆拿仍会要求沙治罗拔图再减薪，甚至拎最低工资留队。