澳洲被视为今届亚洲盃夺标热门之一，阵中唔少球员都喺欧洲搵食，其中效力英冠米杜士堡嘅拉利麦基尔同森姆施华拿，获英格兰名将卡域克大赞系「聪明仔」，上场对印度2人後备登场後，澳洲攻势即刻大大加强，将成为澳洲争霸嘅秘密武器。

25岁嘅拉利麦基尔系进攻发电机，早喺2018年已经加盟米杜士堡门下，但上季喺卡域克领导下先至真系获重用，卡域克亦大赞佢踢法聪明同勇於冒险。拉利麦基尔已成今届亚洲盃「星级人物」，佢亦表示决心踢出风格：「澳洲想展示自己嘅踢法，踢自己最擅长嘅足球，我会不断尝试去制造入球，就算冒险都冇所谓，唔冒险就好难有机会。」

拉利麦基尔嘅师弟森姆施华拿今季亦加盟米杜士堡，呢位23岁翼锋同样获卡域克重用，拉利麦基尔表示：「好开心有咁多澳洲球员一齐效力米杜士堡，我同森姆施华拿一齐学习，默契愈嚟愈好。」米杜士堡出产过唔少顶级澳洲球员，门将舒华沙同前锋维度卡都效力过呢间英格兰球会。