英格兰球星佐敦轩达臣上年由利物浦转投伊蒂法克，经历半季後萌生去意，据报佢一直向球会施压要求放人後，伊蒂法克态度软化，佐敦轩达臣周二(16日)已离开球队喺杜拜嘅集训营，权威记者Fabrizio Romano亦证实佐敦轩达臣有望加盟阿积士！

英国《泰晤士报》报道，佐敦轩达臣周二提前离开伊蒂法克喺杜拜嘅集训营，飞返英国屋企为转会筹划，不过重返欧洲落脚地可能唔系英超，Fabrizio Romano周三(17日)报道：「阿积士好有信心签佐敦轩达臣，谈判已经去到深入阶段，暂时未有转会共识，但阿积士好有决心，交易火热进行中。」

佐敦轩达臣曾公开批评沙特阿拉伯嘅人权状况，所以上年转去沙特落班「搵银」，引嚟各界批评，估唔到只系半季就後悔，据报呢位33岁中场今次重返欧洲，将要接受减薪高达8成。