由葡萄牙巨星C朗担大旗嘅沙特球队艾纳斯原定於周三(24日)及周日(28日)晚喺深圳踢2场表演赛，分别对上海申花及浙江队，但周二(23日)晚突然宣布，C朗因伤无法上阵，将赛事延期，引起买咗门票嘅球迷强烈不满，当晚群情汹涌，有大批球迷前往艾纳斯入住嘅酒店外，鼓噪要求「回水」，场面一度混乱。

艾纳斯周日(21日)已抵达深圳，并入场练波，C朗等球员甚至出席晚宴，原本一切无恙，但周二(23日)晚C朗宣布因小腿肌肉受伤无法上阵，赛会亦决定两场表演赛延期，并安排球迷退票同赔偿。

由於事出突然，令买咗门票嘅球迷非常愤怒，部份人士甚至跑到艾纳斯入住嘅酒店外，要求主办当局交代及赔偿，亦有人话要见C朗，场面非常紧张，幸好最後冇发生冲突。

C朗喺记者会上话：「对我来讲今日系难过嘅一日，我想向中国球迷讲声对唔住，尤其系深圳球迷。足球中，有些事情总系无法控制，我踢咗23年职业足球，遭遇太多伤病，我好难过，我亦了解你哋有几难过。我好享受中国行，我来过中国好多次，中国系我第二故乡。我知道你哋有几伤心，但积极一面系我哋并冇取消比赛，我哋仲会再嚟。」

其实内地已经唔系第一次临时取消星级表演赛，有美斯助阵嘅国际迈亚密原本上年11月访华，但最後却取消，估唔到2位球王都有同一遭遇。