利物浦喺英联盃夺冠，120分钟鸣笛完场嗰阵，「红军」场上11人包括19岁嘅波比奇勒、19岁嘅麦干尼尔、21岁嘅昆沙、18岁嘅丹斯同20岁嘅哈维艾利洛，呢班青训「红孩儿」最终压倒车路士嘅亿万大军，实现今次捧盃「童」话。

利物浦人脚唔算充裕，加上伤兵满营嘅客观环境，令高普今季大胆起用新人，今季一共有18个23岁或以下球员为利物浦上阵，今场决赛就有10个落场球员系23岁或以下，亦有8人系利物浦青训出身。高普赛後表示：「我以利物浦青训为荣，(加时)我觉得球队需要新力量，年龄唔喺我嘅考虑当中。呢班新人嘅成长真系好癫，我由第1课练习已经爱上佢哋。」

季尾将会离开利物浦嘅高普，坦言提拔出青训球星，比起高价收购球员更加满足：「我知道球迷会为球会收购球星而兴奋，但系我可以肯定，佢哋见到利物浦青训球员成为球星，会觉得更加兴奋！」