近期立立乱嘅拜仁慕尼黑，喺教练杜曹宣布季尾离任後，周日(25日)凌晨踢出争气波，凭哈利卡尼喺补时嘅超精彩绝杀，主场2比1击退RB莱比锡，目前仍以8分落後榜首利华古逊。

哈利卡尼今场威胁力大，开波5分钟就有头槌顶中柱，56分钟佢喺左路边走边射，窄角度抽入先开纪录，点知70分钟走甩施斯高被追成1比1。以为拜仁又要失分，哈利卡尼喺补时1分钟献精彩绝杀，佢接应祖普莫亭传送，左脚窝利劲抽挂网，为拜仁全取3分。

哈利卡尼今季各项赛事已入27球，距离个人生涯单季最高入球(30球)只差3球，不过呢位英格兰前锋表明要为杜曹踢争气波：「球会已做出决定(季尾换帅)，作为球员要对球会、教练负责，我知道自己之前表现唔够好，但唔可以讲下就算，而系每一秒都努力战斗，就好似今场咁样。」