周一(25日)凌晨西甲大战，巴塞隆拿主场0比1不敌华历简奴，球会史上第1次单季主场3连败！随住巴塞隆拿输波，皇家马德里嘅榜首优势增加至15分，最後5轮联赛拎多1分就可以封王，周六(30日)主场对爱斯宾奴有望提早锁定西甲冠军。

巴塞隆拿近2仗主场先後输畀法兰克福同卡迪斯，今仗对住弱旅华历简奴继续失魂，开波7分钟就被客队一次美妙组织攻陷。巴塞失守後全力反攻，加维曾经射中门楣，但全场18次攻门都无功而还，最後0比1输波。巴塞曾经喺1998年跨季主场3连败，但单季喺鲁营球场连输3场就系史上首次。

巴塞教练沙维赛後批评球员表现：「我哋冇带住应有嘅斗志、强度嚟比赛，上半场嘅表现唔可以接受，我好嬲同好失望。」巴塞依家同第5位嘅贝迪斯保持6分距离，前4名欧联资格仍未稳阵。