奥士文尼迪比利同巴塞隆拿已经约满，如果唔续约佢就回复自由身，西班牙传媒报道，巴塞同佢续约机会好微，早前为咗悭钱，巴塞最後两仗故意收起迪比利，令球会悭番150万欧元，非常缩骨。

巴塞喺季尾阶段，已提前锁定欧联资格，最後两场对基达菲同维拉利尔，都冇起用迪比利担任正选，其中对基达菲甚至冇落场，结果巴塞最後两仗，分别0比0赛和基达菲，同埋0比2输畀维拉利尔。

传媒发现，自从沙维上任，迪比利一直系球队必然正选，最後两仗突然将佢收起，事必有因，原来同钱有关，根据迪比利合约，喺达到一定正选场次，以及上阵时间过半，就会触发一定奖金条款，如果上述两仗继续正选上阵，巴塞就要向迪比利额外支付150万欧元，依家呢笔钱就唔使畀嘞。

对於巴塞上述缩骨举动，大家都表示理解，因为巴塞真系穷到燶，悭得就悭，佢哋亦似乎放弃同迪比利嘅续约谈判，反正留唔住人，仲使乜喺佢身上嘥米饭？