周日(17日)早上喺美国举行嘅英超季前热身赛，阿仙奴以2比0击败爱华顿，今夏由曼城转投兵工厂嘅前锋加比尔捷西斯又入波，呢位绰号「耶稣」嘅巴西国脚近2场热身赛为阿仙奴轰入3球，状态非常勇猛，主帅阿迪达今次真系签啱人。

加比尔捷西斯上场热身赛对纽伦堡，首次为兵工厂披甲，後备上阵入2球，今仗担任正选，表现非常活跃，开赛15分钟就有1次劲射，仅被爱华顿门将比克福特扑出。

踢到33分钟，兵工厂终於打开纪录，薛迪索拉斯开出角球，门前冇人顶到，皮球刚好落喺伏兵远柱嘅加比尔捷西斯面前，佢顺势射入。

阿仙奴第2个入波都同「耶稣仔」有关，佢喺左路个人突破後传中，加比尔马天尼利出脚稍为改变方面，皮球溜向远柱，由布卡约沙卡近门补射入网，兵工厂36分钟已经领先2比0。

加比尔捷西斯继续表演，临完上半场，佢喺禁区边博到罚球，可惜马田奥迪加特主射贴楣而出，未能再增添纪录。

换边之後，双方都大幅换人，再冇波入，阿仙奴维持赢2比0完场，下仗将於7月21日早上同奥兰多城交锋。