英冠球会哈特斯菲尔德宣布，球队由非联赛球会Solihull Moors签入巨人前锋赫连，呢位22岁球员拥有2米10身高，系英国各级联赛入面最高嘅非门将球员。哈特斯菲尔德上季差少少就升班，话唔定下季有机会喺英超大展身手。

赫连同哈特斯菲尔德签约2年後，球会转会负责人美罗表示：「赫连系个好有趣嘅球员，佢冒起得好快，而且我哋觉得佢可以继续进步，佢非常有自信，我哋已经有几个协助佢成长嘅方案。」赫连喺2020年10月加盟Solihull Moors，至今为球队入16球。

英超过往都有唔少长人前锋，最出名当然系前利物浦球星高治，但呢位英格兰名将都系得2米01，同赫连嘅2米10仲有一段距离。曼联新加盟中坚利辛度马天尼斯只有1米75，如果将来两人有机会交锋，场面肯定会好有趣。