今夏由诺定咸森林外借回收嘅曼联中场小将占士加拿，接受传媒访问时透露渴望为曼联披甲，但如果无法经常上阵，愿意再度外借离队。

21岁嘅占士加拿系曼联青训产品，升上一队後不久即外借到屈福特，近两季再外借到诺定咸森林，协助森林升上英超後今夏重返母会曼联，季前远东集训亦有随队，上仗热身赛对阿士东维拉下半场获派上阵，坦哈格坦言对占士加拿「没有完整印象」，要继续观察先作决定。

不过占士加拿唔想浪费时间，佢认为自己喺屈福特及森林连续踢足两季，对自己进步好大：「对我嚟讲，连续两季不断上阵，一星期又一星期不停比赛，我唔想停落嚟，我可以踢6号及8号位，10号位都踢过，季前热身赛都唔错，希望嚟紧两至三星期，可以展示我嘅能力。」

佢亦明白要喺曼联争取上阵相当困难：「我想为曼联效力，但如果我无法经常上阵，我更愿意外借离队。」曼联今夏已有门将甸恩轩达臣外借到森林，占士加拿亦希望可以外借。