利物浦周三(27日)喺奥地利热身赛作客萨尔斯堡，全场围攻主队下竟然输0比1，乌拉圭前锋达云纽尼斯今场有唔少机会，可惜把握唔到兼有射门中楣。领队高普赛後就话唔担心达云纽尼斯嘅状态，直指佢今场只系夹住後备球员，如果同正选合作会有截然不同表现。

利物浦正选阵容派出大量後备，而上场入4球嘅达云纽尼斯亦率先上阵，佢喺禁区内有唔少掂波机会，但唔系交失就系畀对手拦截，一次头槌同一次射门都唔中目标，最近磅一次埋门出现喺25分钟，佢右路窄位抽射中楣弹出。传闻受曼联垂青嘅施斯高更喺31分钟为萨尔斯堡入波，利物浦下半场换入大批主力，但久攻不下输0比1。

对於达云纽尼斯未能承接上场威势，「红军」领队高普赛後解释：「上半场全队表现唔好，大部份球员都学习紧自己位置，达云纽尼斯得唔到支援，经常都系孤军作战。最後半个钟头我哋不断将个波送入禁区，如果纽尼斯喺度一定好有趣(纽尼斯半场被换)，喺呢啲环境下佢会有好大贡献。」