英超各大豪门夏天密密手买人，利物浦都用破球会纪录8,500万镑收购达云纽尼斯，「擂台趸」曼城虽然都签入艾宁夏兰特等新兵，不过球队人脚其实未见增强好多，事关佢哋同时放走10个球员，卖人收入高达1.74亿镑，创下英超纪录。

曼城夏天「散货」，重点系放走史达宁、加比尔捷西斯同辛真高3大球星，单系卖走佢哋已经套现超过1.2亿镑，另外仲卖走巴祖奴、罗密欧拉维亚等小将，离队合共多达10人，打破车路士5年前夏天卖人套现1.66亿镑嘅英超纪录。

曼城领队哥迪奥拿喺社区盾赛前记招表示，几位球星想转会令佢不得不选择放人：「转会系球会同球员嘅决定，我由第1日就话，球员应该去佢想去嘅地方，我只可以话冇佢哋3个，曼城唔会有今日。我有预感曼城会挂住佢哋，但人生就系咁样，佢哋喺新球会成功，我都会觉得开心。」