曼联今夏两大瞩目收购基斯甸艾历臣同利辛度马天尼斯，日前正式落实波衫号码，丹麦中场基斯甸艾历臣会继承连格件「14号」波衫，而利辛度马天尼斯就着「6号」。其实2人上季都系着「21号」，今次齐齐转号码，令球迷估计「21号」波衫仲等紧真正主人。

基斯甸艾历臣原来最想着「8号」同「23号」，但两件衫已由般奴费南迪斯同劳基梳尔拥有，上季佢喺宾福特着「21号」，不过佢今次就拣连格离队後空出嘅「14号」，查维亚靴南迪斯、阿伦史密夫等用过呢个号码。

至於利辛度马天尼斯本身系中坚，着「6号」都合情合理，但其实佢之前3季效力阿积士都系「21号」，而呢个号码目前仍然悬空，基斯甸艾历臣同利辛度马天尼斯宁愿转冧把都唔拣佢，就令球迷怀疑「21号」系咪已经畀人Book咗，事关曼联头号目标法兰基迪庄，由阿积士到巴塞隆拿都系着「21号」号。