拜仁慕尼黑周日(31日)凌晨喺德超盃，作客5比3击败RB莱比锡夺冠，第10次赢得呢项赛事冠军。今夏强势加盟嘅沙迪奥文尼，首场正式比赛即有入波兼捧盃，亦系佢2022年第4个冠军，真系大丰收！

拜仁今场14分钟由穆斯亚拿先开纪录，31分钟沙迪奥文尼接应基拿比传中近门撞入，完半场前班拿文柏华特为拜仁拉开到3比0。换边後双方放手驳火，RB莱比锡有侯斯顿保、尼干古同丹尼尔奥莫入波，拜仁就由基拿比同利莱辛尼各建一功，最终赢5比3捧盃。

沙迪奥文尼今年已拎英足盃、英联盃、非国盃同德超盃冠军，个人亦拎到非国盃MVP同非洲足球先生两大殊荣，呢位塞内加尔前锋赛後表示：「我当然非常非常开心，赢到加盟後第1场比赛、第1个冠军，我冇更多要求。由第1日开始，我已经话好荣幸效力拜仁慕尼黑，队友令我嘅适应非常容易，我觉得好快乐！」