曼联热身赛华历简奴继续引爆「C朗之乱」，西班牙《阿斯报》再爆内幕，原来该场热身赛坦哈格原打算派阿密特迪亚路踢正选，但C朗突然要求上阵，抢去迪亚路正选位置，结果C朗踢完半场冇表现被换走，尴尬嘅系後备入替嘅迪亚路甫上阵即入波，搞到C朗好冇面。

报道指，坦哈格原准备派阿密特迪亚路落场，该20岁科特迪瓦小将上季外借格拉斯哥流浪磨练後归队，坦帅打算畀机会佢，今场安排上阵并已告知球员，不过C朗於周五宣布自己将会登场，周六再向教练团反映自己想法，令事情有变。

面对C朗要求，强调军纪严明嘅坦哈格都冇符，被迫临时改变计划，暂时收起迪亚路，由C朗正选披甲。不过练咗几课嘅C朗，赛事中并无表现，半场被换走，由迪亚路入替，迪亚路落场即入波，C朗被打面，搞到呢位巨星未完场已离开奥脱福。

不过C朗就算得罪教练都唔会得罪球迷，佢事後喺社交网发帖表达心情，形容自己好高兴返嚟踢波，仲上载与球迷互动嘅图片，表示：「同球迷一齐真系好。」