由Amazon拍摄嘅纪录片《All or Nothing》，上季开拍阿仙奴系列，周三(3日)凌晨喺伦敦举行首映礼，领队阿迪达亦带同多位球员出席撑场，据报阿仙奴拍摄呢套纪录片，会获得1,000万镑酬劳，难怪球队上下都鼎力支持。

今次首映礼星光熠熠，阿迪达夫妇同总监伊度之外，富安健洋、宾韦特、伊美路维、基兰泰亚尼同洛贺丁5名球员都有出席，仲有施文、温特本等昔日名将到临，而纪录片主持系曾获奥斯卡最佳男配角嘅Daniel Kaluuya，呢位英国影星当然亦有到场。

受到球迷欢迎嘅《All or Nothing》系列，之前已经拍过曼城同热刺，上季开拍阿仙奴系列，据报「兵工厂」将袋走1,000万镑。阿迪达早前曾经表示，更衣室内长期有镜头影住会「唔自在」，但适应後已经唔记得有人喺度拍嘢，对日常备战影响唔大。