阿仙奴日前宣布将宾特尼奴卖畀富咸後，龙门位置亦进行大执位，上年加盟嘅英格兰门将兰斯达尔，开锣战宣布新球季继承尼奴件1号波衫，锁定正选门神位置。阿仙奴亦宣布提拔青年军海恩上一队，呢位20岁新星虽然从未为阿仙奴一队上阵，但就已经13次代表国家队出赛，认真神奇。

英超规定联赛开锣後，球员唔可以再转球衣号码，随住尼奴日前转投富咸腾出1号波衫，兰斯达尔就赶及喺开锣战前转「冧把」，佢喺官方声明表示：「非常荣幸可以继承呢件1号，好多阿仙奴传奇都用过呢个号码，我希望可以延续佢哋嘅精神，并加入自己嘅色彩。」

兰斯达尔亦会面临唔少竞争，阿仙奴今夏签入美国国家队正选门将马特端纳外，亦由青年军提拔20岁门将海恩，呢位20岁门将已为爱沙尼亚国家队上阵13次，亦系前英超门将潘姆嘅「学生」，来头唔细。