巴塞隆拿前锋迪比被罗拔利云度夫斯基抢走9号球衣之後，并未获分配新号码，据悉呢位28岁荷兰国脚好大机会离队，佢嘅经理人已经联络祖云达斯，有望促成迪比加盟呢支意甲劲旅。

巴塞隆拿急需要清走部份球员，腾出薪酬空间畀新兵注册，教练沙维已决定放弃迪比，会方甚至愿意畀呢位前锋自由身走人。

事实上，迪比上年夏天亦系以自由身从里昂加盟巴塞，会方就算今夏免转会费放走佢，亦冇蚀底。

祖云达斯一向精打细算，专门签自由身球员，今夏已经免转会费签入迪马利亚，并希望再签入前锋，代替离队嘅艾华路莫拉达同保罗戴巴拿，如果巴塞真系唔收取转会费，相信祖记好可能接收迪比。