曼联开季踢到一镬粥，不过坦哈格仍有佢嘅坚持，今夏由诺定咸森林回收嘅21岁小将占士加拿，始终未获坦哈格重用，会方近日打算将佢出售，标价1400万镑。

占士加拿系曼联青训产品，不过喺一队时间唔长，出道不久就外借屈福特，其後去咗诺定咸森林，上季协助球队重返英超，曼联今季将佢收回，初时佢以为可以为曼联上阵，可惜佢真系谂多咗。

远东集训後，占士加拿并未获坦哈格重用，会方对於该球员去留持开放态度，英国《The Athletic》报道，如果有合适报价，曼联愿意放人，而该小将估价为1400万镑，并接受外借。

报道指，爱华顿、修咸顿、列斯联及热刺，都有留意占士加拿动向，可谓不愁出路，不过佢曾外借嘅诺定咸森林则尚未表态。