曼联喺「双红会」反弹击败利物浦，弃用C朗拿度同哈利马古尼嘅效果立竿见影，亦令人忧虑2大球星喺曼联嘅前景，不过领队坦哈格赛後否认已放弃C朗，直指佢仍然系队中领袖之一，相信C朗可以融入自己嘅体系。

C朗今场只系入替踢几分钟，被问到今次变阵，坦哈格表示：「我哋有庞大阵容，亦有自己嘅踢法、风格同作战计划，我哋只系拣出今场最佳方案，下一场可能又系另一个计划。」被问到C朗可唔可以融入佢嘅计划，坦哈格回应：「我觉得佢可以，C朗足球生涯踢过唔同教练、球队同体系，一样都交到表现，依家点解唔可以？只要有表现，年龄唔系一个问题。」

坦哈格更指C朗将会系球队领袖之一：「卡斯米路、华拉尼、C朗拿度都赢过好多锦标，佢哋会引领年轻球员，我希望佢哋嘅出现可以刺激其他球员。转会窗仲未完，我哋想再引入更多有质素嘅球员。」