曼联连续收购2位巴西国脚卡斯米路、安东尼马菲奥斯，球会史上累计签入10位「森巴兵」，但睇番红魔鬼过去嘅巴西球员表现都令人失望，卡、安二人能否协助球队创佳绩仍然系疑问。

曼联史上最雷声大雨点小嘅巴西球员，一定系基巴臣，呢位中场协助巴西夺得2002年世界盃冠军，1年之後加盟红魔鬼，但因为伤患问题，仅效力2季，喺英超上阵20次入2球，就被卖去比锡达斯。

另1位曾经被曼联名帅费格逊睇好嘅巴西中场路尔斯安达臣，一样系反高潮，2007年以当时天价3,000万欧元由波图加盟曼联，但踢唔出身价，佢效力8季大部份时间担任後备。另外，达施华兄弟亦系平庸之辈，

至於近年嘅安达斯彭利拿被寸系「热身赛球王」，不断被外借，今季正式转投富咸。左闸阿历士迪尼斯效力曼联2季都做後备，今季被外借去西维尔。

现时阵中嘅费特表现亦备受批评，近期已失去正选。曼联唔理森巴兵黑历史，重金买入卡斯米路、安东尼马菲奥斯，只能祝佢哋好运。