般尼茅夫宣布辞退领队柏加之後，李斯特城主帅罗渣士可能步佢後尘，「狐狸兵团」今季表现令人失望，英超开季4战仅1和3负，排积分榜包尾。

李斯特城未来3场英超对手，包括主场对曼联、作客对白礼顿、主场对阿士东维拉，除咗红魔鬼属於传统劲旅之外，另外两队同李城属於同级数，如果「狐狸兵团」都赢唔到，实在讲唔过去。

特别系对阿士东维拉最为关键，因为维拉成绩亦欠佳，领队谢拉特以3倍，成为英超「下一位离任领队」次热人选，若然2人有幸9月10日晚仲可以交手，胜负或会直接决定佢哋去留。

罗渣士似乎已经有下台准备，佢话：「如果球会需要改变，我会接受，因为足球就系咁样，我喺球队由朝工作到晚，成绩唔好当然会有压力，总之我可以做嘅事，就系尽最大努力推动球队做到最好。」