祖云达斯喺欧联H组第一击作客巴黎圣日耳门(PSG)，虽然牌面上唔及对手，不过教练阿里基就有4个「间谍」可以提供情报，包括今夏由PSG过档嘅迪马利亚同里安度柏利迪斯，加上拉比奥特同摩斯坚恩两个前PSG球员，对祖云达斯部署或有帮助。

据《都灵体育报》报道，阿里基为准备呢场大战，专登问4位前PSG球员意见，希望收集到有用情报，尤其迪马利亚同里安度柏利迪斯唔单止喺PSG效力多年，同美斯亦系阿根廷国家队队友，对「球王」非常熟悉。至於拉比奥特本身系PSG青训产品，而摩斯坚恩就曾以借将身份效力过PSG一年。

同样曾经效力过两队嘅法国中场马度迪，赛前就分析：「祖云达斯签入迪马利亚系顶级收购，佢系与别不同嘅球员，我未同里安度柏利迪斯做过队友，但知道佢系个出色球员。PSG有美斯、麦巴比同尼马，如果有人可以困得住佢哋，呢个人好可能就系阿里基。」