近期强势复苏嘅曼联，周五(9日)凌晨展开欧霸盃分组赛即遇滑铁卢。「红魔鬼」主场迎战西甲嘅皇家苏斯达，领队坦哈格畀C朗拿度、哈利马古尼复任正选，可惜球队表现差劲，最後更因球证一次争议性12码判决，0比1输波收场。

曼联喺呢场E组赛事进行轮换，C朗、马古尼同卡斯米路都正选上阵，人气新兵安东尼马菲奥斯亦继续担正，面对有大衞施华、久保建英等球星嘅皇家苏斯达，曼联虽然稍占上风，不过进攻质素麻麻，上半场C朗曾头槌顶入，但越位在先被判诈胡。

坦哈格见势色唔对，半场换入般奴费南迪斯同利辛度马天尼斯，58分钟出现争议性一幕，大衞施华禁区内起脚，利辛度马天尼斯飞身拦截下，个波中脚再弹向手臂，呢位中坚根本冇时间避开，球证直指12码，VAR覆核後亦维持判决，皇苏由布里斯文迪斯操刀射入全场唯一入球。

今场系C朗足球生涯首次出战欧霸盃，踢足90分钟表现落力但效率极低，全场4次射门冇一脚命中目标。尴尬嘅系，C朗今季2次出任正选，曼联都系冇波入兼输波，4连胜走势亦告一段落。