利物浦今季英超及欧联双线失利，中场人脚退化被指系最大「死因」，所以会方已急不及待计划明年1月转会市场重开後收购中场，头号目标直指多蒙特天才祖迪比宁咸。

利物浦今夏组军工作明显失策，加上出现伤兵潮，焗住转会窗关闭前夕，临急临忙向祖云达斯借用中场艾法美路，但治标不治本。

为咗球队未来着想，会方已经开始筹备冬季转会市场买人，德国《图片报》指红军计划收购祖迪比宁咸。

其实利物浦想签入呢位19岁英格兰国脚，已经系公开嘅秘密，原本打算明夏先至出手，但红军中场人脚告急之下，希望提早冬季就搵佢加盟。

不过，祖迪比宁咸仲有3年合约在身，加上皇马亦有意争夺佢，相信多蒙特会吊高来卖。多蒙特上年夏天以7,300万镑将另一位英格兰国脚出售畀曼联，估计祖迪比宁咸转会费唔会低过呢个价钱。