巴塞隆拿开季大勇，周日(11日)凌晨作客4比0炒卡迪斯，波兰前锋罗拔利云度夫斯基今场虽然先任後备，但落场半个钟头多啲就交出1入波同2助攻，打破西甲46年嘅入球纪录，认真犀利！

「罗拔仔」由拜仁慕尼黑过档後，除咗首演对华历简奴冇波入，之後每场都有进帐，连埋欧联在内为巴塞上阵6仗入9球，系近46年来西甲新加盟球员入球纪录，华伦西亚嘅巴拉圭名将迪亚特，喺1976年同样系加盟头6场入9球。

如果单计西甲，「罗拔仔」头5场联赛入6球，系21世纪西甲最快入到6球嘅球员，打破西维尔前锋安达施华2018年头6场入6球纪录，而且比C朗拿度喺皇家马德里头5仗入5球成绩更胜一筹。