纽卡素官方周二(13日)宣布，签入自由身门将卡利奥斯，合约为期仅4个月，明年1月约满後有半年续约选项。

卡利奥斯转眼间已经29岁，佢上季重返利物浦後，一整季都冇上阵，今夏约满後回复自由身离队，估唔到仲有纽卡素收留。

呢位德国门将系着名「胶龙」，2018年欧联决赛为利物浦把关两度严重犯错，累球队输畀皇马痛失冠军，红军自此未再用佢把关，先後外借去比锡达斯同柏林联，上季回归利物浦後坐咗一季冷板至完约，虽然佢冇上阵，但利物浦上季欧联决赛又试输波，而且同样输畀皇马，都咪话唔邪。

巧合嘅系，纽卡素副选门将杜巴夫卡近日外借到曼联，呢间富豪球会急需一名门将做尼克普比副手，领队艾迪侯域又觉得卡利奥斯有丰富英超同欧洲赛经验，可能帮到手，所以签佢返嚟。

不过纽卡素都对卡利奥斯阵「胶味」有所防避，所以暂时只签4个月合约，睇睇咩情况，冇咩事再续约，卡利奥斯只要喺纽卡素专心陪练唔搞事，相信做个後备门将都冇问题。