曾经系全球最高收入球会嘅巴塞隆拿近年陷入财困，今季要动用多次杠杆及变卖资产续命，系人都知前景唔乐观，但会方最新公布嘅财政收入同预测，全部录得正数，唔通真系畀佢哋绝地翻身？

巴塞最新公布上季收入，共有10.18亿欧元，盈利9800万欧元，数字系咪真确令人怀疑，事关佢哋今夏全靠变卖电视转播权部分收益同部分工作室股权，先至勉强通过到财政公平法案审核，盈利唔知点计出嚟。

巴塞董事会公布2022至23球季预算，营业收入增长至12.55亿欧元，预测利润高达2.74亿欧元，如果呢条数成真，咁就真系一天都光晒。

虽然会方公布嘅数字令人怀疑，但巴塞今季入座率同收入有大幅增长确系事实，据报巴塞今季重组後重拾霸气，好成绩亦带动入座率上升，鲁营球场开季至今场均入座率达到82,538人，为欧洲第1，比第2位嘅多蒙特多2000人，加埋几场热身赛同慈善赛，巴塞开季至今个几月，已录得1385万欧元盈利，照呢个增长幅度计算，今季真系有钱赚都唔奇喎！