意大利名帅干地今季带领热刺起飞，不过佢同球会只剩唔够1年合约，而且迟迟拒绝续约，意大利媒体爆料，密谋换帅嘅祖云达斯已将干地视为头号猎物，而干地亦渴望再次执教呢支曾度过16年生涯嘅班霸。53岁嘅干地近日神秘现身都灵，据报已向祖记表明对过档持开放态度。

祖云达斯开季成绩惨淡，近8场赛事只赢过1场，教练阿里基帅位已进入倒数，据意大利《Il Bianco Nero》报道，虽然祖记会长安迪亚阿尼利同干地有牙齿印，不过总监尼维特就系干地支持者兼老友，消息指祖记已锁定干地为换帅头号人选，依家只系等紧「几时」炒阿里基，季中换帅定系畀佢教埋今季仍未有共识。

报道指祖记已就回巢一事同干地接触，得到干地嘅回覆系抱「开放」态度，消息指干地一直希望回归祖记，一来佢球员同教练生涯喺祖记度过16个寒暑，2011年至14年执教更加实现意甲3连霸；二来佢家人仍然住喺都灵，今次国际赛休战佢就即刻飞返意大利。

事实上，干地执教生涯每队都「教唔长」，除执教祖记3年之外，其余执教国际米兰、车路士等7支球队都唔会教多过2年，加上佢一直拒绝同热刺续约，干地上月曾公开表示：「我觉得合约一啲都唔重要，最重要系合作开心，合约长度唔会有咩影响，对球会嚟讲(合约)都系一种负担。」