利物浦今夏用8,500万镑天价收购乌拉圭前锋达云纽尼斯，唔少球迷期等睇佢同艾宁夏兰特一决高下，势估唔到纽尼斯完全踢唔掂，加盟以来英超同欧联合共只踢过2次正选，入波同红牌各1，近日佢返乌拉圭国家队练习，更有一次「离谱射门」射到去角球旗，大批网民疯传影片耻笑。

达云纽尼斯离谱射门：https://bit.ly/3C1CmN0

乌拉圭将会喺热身赛对伊朗同加拿大，达云纽尼斯亦有份入选，日前练习期间，呢位贵价前锋喺边线抢走守衞脚下球，无人看管下杀入禁区，点知佢面对龙门起脚，个波竟然射到去角球旗位置，大批网民留言「新卡路尔」作讽刺，亦有唔少利迷埋怨宾菲加系「黑店」，呃咗利物浦大笔转会费。

利物浦名宿加历查日前表示，要睇多5至6个星期先断定达云纽尼斯系咪「水货」：「达云纽尼斯系个好前锋，唔系好多後衞想对住佢，问题系利物浦可唔可以同佢联系到，达云纽尼斯同利物浦其他前锋完全唔同类型，未来5至6个星期睇佢融合成点，到时就睇到佢系咪唔适合利物浦。」