西班牙喺欧国联生死战作客葡萄牙前，领队安历基受到球迷猛烈批评，佢被指点兵偏袒「巴塞兵」，就连佐迪艾巴、费伦托利斯呢啲喺巴塞隆拿长坐冷板嘅球员都当宝物，直接影响西班牙成绩。

西班牙上场输畀瑞士，今次有份入选嘅6个巴塞隆拿球员全部正选上阵，柏迪、加维都算系国家重点培育新星，但佐迪艾巴今季西甲只踢过1场正选，前锋费伦托利斯亦只系踢过2场正选，联赛1球波都冇入过，照获重用就令球迷不满，就连中坚艾利加西亚表现都错漏百出，安历基嘅用人就受到怀疑。

事实上，安历基上年欧国盃曾被指打压「皇马帮」，一个皇马球员都冇份踢决赛周，包括沙治奥拉莫斯、丹尼尔卡华积等球星被冷待，大批球迷留言：「安历基嘅偏心会令西班牙失去争冠机会」、「安历基要停止偏好巴塞兵，费伦托利斯、艾利加西亚连入选资格都冇」......