巴塞会长拉波塔曾公开表示，巴塞在道义上亏欠美斯，希望佢将来重返巴塞，不过西班牙《马卡报》踢爆，原来巴塞一直以来都冇联络过美斯，而且关系疏远，回巢之说不攻自破；另边厢巴黎圣日耳门已向美斯开出1+1合约，年薪维持3000万欧元不变，PSG主席艾卡理化已接触美斯团队，美斯拣边队，毋须多作考虑。

《马卡报》指出，巴塞同美斯已经和解并非事实，而且关系疏远，虽然巴塞高层多次公开表示希望美斯回巢，但实际上从未有人同美斯团队接触，一切都系斋吹。

美斯离开巴塞仲有唔少内幕，例如当日拉波塔喺最後一刻取消续约，形同出卖，美斯对此余怒未消，此外，美斯回巢亦有多项条件，首先系巴塞必须清除辧公室及更衣室内某些美斯眼中钉，仲有巴塞必须确保美斯嘅主力位置。

西班牙电台报道，PSG已向美斯开出续约条件，年期1+1，年薪3000万欧元不变，仲有艾卡理化表达意愿，希望美斯喺PSG踢到挂靴，诚意十足，同巴塞形成强烈对比。