法甲劲旅巴黎圣日耳门(PSG)内讧问题升级，法国《队报》周四(29日)爆出内幕，指尼马同基利安麦巴比嘅关系已经跌到最低点，原因系麦巴比曾经喺暑假期间，要求PSG将尼马卖走，2人曾喺更衣室激烈争执，依家只系靠美斯做「和事佬」，暂时将裂痕掩饰。

尼马同麦巴比不和早有传闻，8月对蒙彼利埃一仗两人曾经争射12码，据报赛後曾喺更衣室发生冲突，要沙治奥拉莫斯将佢哋分开。《队报》消息指，两人不和始於今个夏天，PSG一度将尼马挂牌出售，虽然最终未有成事，但系尼马认定系麦巴比要求PSG将佢踢走，亦对麦巴比喺PSG嘅影响感到震惊。

尼马日前为巴西国家队比赛期间，曾被记者问到同麦巴比嘅关系，当时尼马只系回应：「同麦巴比？」随即转身走人终止访问。报道指原来同两人关系唔错嘅美斯，曾经做「和事佬」角色，叫两人至少唔好公开咁攻击对方，所以尼马一听到麦巴比个名，唔作出回应就走人。两大球星不和，令人担心计时炸弹最终引爆，影响PSG成绩。