巴塞隆拿喺欧联不敌国际米兰，输波之余仲损兵折将，中坚安达斯基斯坦臣喺下半场开波冇耐受伤，要由老将碧基入替，球会随後发声明证实呢位丹麦中坚足踝韧带受伤，令巴塞隆拿只系得番2个中坚候命。

巴塞指安达斯基斯坦臣嘅足踝韧带伤患仍要详细检查，但《阿斯报》率先爆料，话基斯坦臣至少要抖3个星期，由於2位正选中坚朗奴阿拿奥祖同祖利斯古迪都喺国际赛受伤，球队依家只系得番艾利加西亚同碧基2名中坚可以候命。

如果安达斯基斯坦臣真系抖3个星期，将会缺席5场大战，包括欧联主场对国际米兰，以及西甲作客皇家马德里2大关键大战。唔好忘记，巴塞右闸比利连日前亦告受伤，右闸位亦只系得沙治罗拔图顶住。