今季表现备受批评嘅阿历山大阿诺特，周三(5日)凌晨欧联大踢争气波，轰入精彩罚球率利物浦主场2比0击败格拉斯哥流浪，喺A组守住第2位出线位置。「红军」领队高普赛後大赞阿历山大阿诺特嘅表现，认为佢受嘅批评并唔公平。

利物浦近期失球多，高普今场改踢4-2-3-1阵式稳固防线，而且开波7分钟，就有阿历山大阿诺特轰入精彩罚球先开纪录，「红军」之後一直控制战局，53分钟路尔斯戴亚斯博到12码，穆罕默德沙拿操刀命中，带领利物浦赢2比0。

被视为後防漏洞嘅阿历山大阿诺特赛後反击指控：「其他人好多嘢讲，但我只系专注为球队踢好波，今季开局唔多顺利，但我好期待之後嘅比赛。」高普亦继续力撑爱将：「阿诺特踢得好好，尤其系防守上，而且仲入咗球靓波，球队嘅踢法系要冒险，防守难免有漏洞，而呢个漏洞并唔系阿诺特嘅问题。」