前曼联看守领队卡域克有望出山，坐正做主帅！根据英国《太阳报》及《每日邮报》报道，英冠球队米杜士堡早前解雇领队韦达後，计划邀请卡域克接手领军。

呢位41岁红魔鬼名宿上年11月曾经短暂接替当时被曼联炒鱿嘅苏斯克查，带队踢3场硬仗取得2胜1和，但却未能留任，成为曼联上季无法打入英超前4位，失去欧联入场券嘅转捩点。

米杜士堡今季英冠12战只有3胜4和5负，排联赛18位，若然再冇改善，随时会卷入降班漩涡，所以会方决定换帅，炒咗韦达，并联络卡域克接任。

虽然卡域克教波资历尚浅，但曾经喺曼联教练团工作多时，做过摩连奴、苏斯克查副手，喺两人身上学到唔少嘢。

事实上，苏斯克查上年11月下台後，卡域克临危受命领军，佢带队踢3场比赛，取得2胜1和，包括欧联击败维拉利尔，英超分别打和车路士同赢阿仙奴，成绩「含金量」十足，表现受到好评。

不过，曼联管理层却选择信名牌，请来德国名宿兰历克担任看守领队，卡域克只能黯然辞职。

曼联由兰历克接手後，成绩不进反退，上季仅得第6位，未能参加今届欧联，继而发生C朗想离队嘅风波。因此，唔少网民都替卡域克抱不平，指佢蒙受「千古奇冤」，并认为如果曼联管理层当时信任卡域克，一直由佢执教，结果可能好唔同。

米杜士堡会方慧眼识英雄，认为卡域克有能力拯救球队，将佢列为头号新帅人选。对於呢位前英格兰国脚而言，亦系一次证明自己教波实力嘅好机会，双方有望一拍即合。