「红牌大王」沙治奥拉莫斯死性不改！周日(9日)凌晨法甲赛事，巴黎圣日耳门(PSG)作客被兰斯闷和0比0，西班牙中坚沙治奥拉莫斯上半场尾段因为投诉球证，10秒内连食2张黄牌被逐，成为球队失分罪人。

PSG今场有美斯受伤缺阵，尼马亦先任後备，面对顽强嘅兰斯创造机会唔多，踢到41分钟嗰阵，马高华拉堤回防拦截被判犯规，沙治奥拉莫斯即向球证投诉，用咗不当言语被罚黄牌，马高华拉堤已经即刻将佢拉开，点知呢位火爆守将继续出言不逊，逼到球证再向佢出示第2面黄牌，PSG打少个下最终只能对兰斯闷和0比0。

今次系沙治奥拉莫斯职业生涯第29次食红牌，当中21次喺联赛被逐，继续刷新欧洲5大联赛被逐次数最多纪录。PSG教练加迪亚赛後表示：「我唔知沙治奥拉莫斯系咪犯错，我肯定佢唔系想侮辱球证，佢冇针对任何人，只系表达自己情绪，类似说话喺球场上面一个星期可以听到几百次。」