曼联开季表现飘忽，新帅坦哈格夏天引入多名新兵，暂时演出亦唔算标青。据英国《太阳报》报道，坦哈格近期发现一班新兵对曼联辉煌历史完全唔熟，为咗加强佢哋嘅「红魔DNA」，坦哈格勒令几位新兵用私人时间，去曼联博物馆「温书」。

曼联喺打吡战惨败後，坦哈格曾质问球员：「以曼联嘅历史，你知唔知呢场惨败代表乜？」消息人士透露：「坦哈格问球员对曼联历史有几了解，结果好多球员都话从来未去过曼联博物馆，球会职员对佢哋认识曼联嘅不足感到震惊。」

报道指坦哈格自签约曼联後，已经2次去参观球会博物馆，佢亦勒令一班新球员要喺博物馆开放时间，或者闭馆之後安排参观。事实上，利辛度马天尼斯、安东尼马菲奥斯同杜维尔马拉西亚等，都系因为坦哈格先至加盟，唔熟曼联历史都唔出奇。