欧霸盃C组完成第4轮分组赛，贝迪斯喺主场被罗马逼和1比1，不过罗马呢1分只系吊住条命，出线形势并唔乐观。

罗马今场残阵出战，保罗戴巴拿养伤、尼高路辛尼奥路又要停赛，贝迪斯34分钟由简拿尼斯入波领先，换边後罗马表现回勇，喺53分钟由比洛迪追成平手，最终两队踢成1比1完场。罗马依家4战只得4分排第3位，落後次席嘅卢多格德斯3分，最後2轮赛事要赢晒，出线先有价讲。

罗马教练摩连奴赛後表示：「上半场嘅表现简直系灾难，球员下半场出嚟嗰阵个个耳仔都红晒，因为我闹得佢哋好甘，不过表现系有改善。呢1分令我哋保持出线希望，最後2场非胜不可，希望球员可以专注争胜。」