周日(16日)凌晨西甲赛事，马德里体育会作客1比0险胜毕尔包，啱啱先由巴塞隆拿正式买断嘅基沙文，攻入佢喺马体会生涯第100个西甲入球，意义非凡。

之前因为巴塞外借条款问题，几乎每场都只系踢30分钟左右嘅基沙文，正式转会後即刻复任正选，今场更喺47分钟接应艾华路莫拉达传送，攻入全场唯一入球。马体会之後有门将奥比历脑震荡伤出，尾段被围攻下仍坚守城池，最终赢1比0拎到联赛3连胜。

基沙文喺2014至2019年间，为马体会喺西甲入94球，上季外借回巢後只入3球，今季季初虽然长居後备，今仗场入波已经系今季第3球，令佢成为马体会史上第6位有100个联赛入波球员。基沙文赛後表示：「之前唔能够做正选系好失望，但无论正选定後备，我都会全力以赴，我依家好开心，因为听日我可以同囝囝讲，爸爸又入波啦！」