英超榜首阿仙奴今季成绩突出，为咗保持强劲气势，球队亦提早为下半季作出部署，据报「兵工厂」会喺12月份英超休战期间，拉队去杜拜进行集训，除咗可以喺阳光下练波兼「叉电」，仲可以方便一班喺卡塔尔踢世界盃嘅国脚随时归队。

英超喺11月中休战，让路世界盃决赛周上演，英国《每日邮报》指阿仙奴已计划好，12月会飞去杜拜集训，由於杜拜同卡塔尔非常接近，一班「世盃脚」如果提早出局，就可以极速去杜拜会合大军。阿仙奴阵中有多位英格兰、巴西国脚，亦有汤马士柏迪(加纳)、格列沙加(瑞士)等球员有机会出战世界盃。

报道指阿仙奴呢个做法，有唔少英超同欧洲球队效法，「兵工厂」更已约战去中东集训嘅球队，目前已决定同意甲劲旅AC米兰踢热身赛，据报利物浦亦可能系对手之一。