曼联上季炒苏斯克查後，盛传干地系新帅嘅目标人选，但球队最终拣咗坦哈格，引起唔少质疑声音，曼联周四(20日)凌晨主场对热刺前，名宿艾拉亦表示「宁愿曼联搵干地执教」，不过呢场波曼联压倒性2比0打爆热刺，就证明搵坦哈格执教系正确选择。

曼联经过开季低潮後，近期表现全面复苏，今季喺奥脱福3次迎战「Big 6」，分别2比1赢利物浦、3比1赢阿仙奴同2比0赢热刺，进攻踢法好睇又好食，相反干地执教嘅热刺独沽一味死守，季初作客车路士捱打下争议性执番1分，之後作客阿仙奴同曼联都毫无招架之力下输波。

曼联今仗对住「泊大巴」嘅热刺，全场制造28次攻门，系干地318场执教生涯入面被射门次数最多一仗，战术完全被坦哈格克制。坦哈格赛後表示：「今场系曼联今季表现最好一仗，我哋有11个人进攻、有11个人防守，我唔可以话完全满意，但呢个系曼联应该有嘅水平。」