德国盃第2圈赛事，拜仁慕尼黑周四(20日)凌晨作客5比2大破奥格斯堡，前锋祖普莫亭继续有出色表现，今场又有2个入波同1次助攻，原来呢位喀麦隆前锋喺拜仁慕尼黑嘅入波效率，竟然仲劲过罗拔利云度夫斯基！

拜仁上场联赛对弗赖堡，祖普莫亭今季首次正选有1入波1助攻，今场德盃佢继续挂帅，拜仁9分钟先失波，但祖普莫亭27分钟就追平，呢位中锋53分钟助攻甘美治射成2比1，6分钟後再攻入个人第2球。奥格斯堡65分钟追番1球，但穆斯亚拿同艾方素戴维斯尾段入波，助拜仁大胜5比2晋级。

自从2年前加盟拜仁後，祖普莫亭喺2,129分钟上阵时间入面，交出22个入波同8次助攻，平均71分钟就有1个入球贡献，而罗拔利云度夫斯基喺同一段时间内，平均每76.3分钟先有1个入球贡献，可见祖普莫亭嘅实力绝对唔差！