基利安麦巴比今夏「戏剧性」续约巴黎圣日耳门(PSG)，令皇家马德里好梦成空，《巴黎人报》近日将麦巴比嘅合约细节曝光，揭露如果呢位法国国脚履行3年合约，将会袋走6.3亿欧元，成为体育史上最丰厚嘅运动员合约。

麦巴比同PSG嘅合约去到2025年，年薪7,200万欧元已经相当夸张，但原来「好戏在後头」，PSG仲要分3年支付总共1.8亿欧元签字费，另外仲有一个「层递式」忠诚奖金条款，当麦巴比完成第1年合约有7,000万欧元奖金，完成第2年後再收8,000万欧元，履行晒3年合约就再拎多9,000万欧元！除咗丰富嘅奖金之外，据报仲有一项自动延长2年合约嘅条款，但呢项条款只能够由麦巴比启动。

其实美斯喺2017年续约巴塞隆拿，合约模式同麦巴比呢份合约非常相似，同样系巨额签字费加上忠诚奖金，不过当时美斯份合约总值5.5亿欧元，麦巴比今次就打破佢嘅纪录。