C朗拿度早前喺英超发脾气提早离场，受到曼联领队坦哈格纪律处分，双方关系陷入新低点，1月「分手」似乎事在必行。据英国《每日邮报》报道，车路士班主保利同C朗经理人佐治文迪斯关系密切，准备1月再次出手斟介。

车路士嘅美国班主保利，一直视C朗为「梦幻收购」，今个夏天就曾经同佐治文迪斯会面斟介，不过当时领队杜曹坚决反对，令交易未能实现，不过呢位德国教头已被炒鱿，盛传「反对签C朗」都系杜曹嘅「死因」之一，唔知新帅朴达会唔会成为收购C朗嘅「拦路虎」。

事实上，车路士目前只有奥巴美扬同布查两位正箭头，不过奥巴美扬嘅表现仍然飘忽，布查又未够「卡士」担起大旗，对於要喺英超同欧联逐鹿嘅车路士，签入星级前锋都系有需要。